Obradoiro de teatro
O obradoiro de teatro preséntase coma un laboratorio onde poidamos deixar voar a nosa imaxinación e creatividade a través do xogo, do corpo e da voz. Traballamos do colectivo para o individual facendo fincapé no grupo e na relación entre as integrantes. Un ratiño pra pasálo moi divertido e traballar as propias experiencias, porque o teatro é vida.
A arte dramática serve ás crianzas de tal xeito que serán elas mesmas quen adapten o teatro ás súas necesidades creando o seu propio método. Trátase de facer un “laboratorio”, un experimento individual e colectivo que potenciará as súas facultades físicas, intelectuais e creativas. Poderanse experimentar libremente as posibilidades corporais e educación sensorial (Grotowsky), estimulando a creatividade mediante xogos dramáticos e improvisacións (Stanivslasky e Eugenio Barba), tanto individual como colectivamente. Fomentaráse a lectura, dicción e a escrita creativa, será outro dos obxectivos; a través do coñecemento das dramaturgas máis relevantes da literatura galega e mundial. Este proxecto nace na comarca do Deza no ano 2013 e medra no mundo rural en contacto coa natureza fomentando a creatividade e capacidade analítica mediante a observación directa e desprovista da procura do resultado e centrada no proceso.
Obxectivos
“O teatro non ten categorías, trata sobre a vida. Este
é o único punto de partida e non hai nada máis que sexa
realmente importante.
O teatro é vida.”
Metodoloxía
Nacín en Santiago de Compostela no 1986 e medrei no berce dunha aldea chea de fábulas, contos e cantigas. Dos beizos das avoas saíu a maxia da literatura popular que fixeron pouso na miña formación e entendemento da arte dramática. Así mesmo, cursei maxisterio e literatura en Madrid. Nestes anos comezaron as investigacións sobre o
teatro cervantino e a literatura popular, así coma a miña carreira profesional como actriz. Curso dirección na ESAD, e tamén me formo noutros ámbitos interpretativos, danza ou música.
No 2012 viaxei a Brasil para realizar unha xira coa compañía Arte Livre onde se afianzaron as miñas inquedanzas sobre o teatro infantil e a dramatización dos contos. Tras un ano de enchouparme na cultura e arte deste país, regresei á Bandeira para poñer en práctica estas aprendizaxes, así coma crear laboratorios”.
Participei no 2014 nun programa de humor da TVG: Os aspirantes, así como diversas colaboracións no Luar. Alí comezou a miña andaina televisiva con outros traballos audiovisuais na TVG, coma en Dalia, a modista no papel de Valentina, ou Pazo de Familia, no pasado de Suevia.
Tamén traballei con CTV en O sabor das margaridas ou en RAPA no papel de Ángela de Portocabo para Movistar +. Así coma numerosos proxectos publicitarios e curtametraxes.
Tamén traballo pra outras compañías, destacando a montaxe de Cultura Activa dirixida por Fina Calleja e con Rocío González, Rosalía , onde encarno a Rosalía de Castro na súa infancia.
Teño unha relación moi estreita coas bandas de música como narradora e actriz, destacando a montaxe da Divina Comedia e Conto de Nadal, realizado coa Banda de Vilatuxe, Oscar of Amnesty no papel de Marianela coa Banda Municipal de Pontevedra ou Eu é Outro xunto con Xocas Meixide e a Banda Municipal de A Coruña, baixo a batuta de Juanjo Ocón. Participo coa Banda Municipal de Santiago nos Didácticos para as crianzas da man de David Fiúza.
Así mesmo son trompista na Banda Recreativa e Cultural de A Bandeira. En xullo do 2021 recibín con moito agarimo o XVI premio “Carballeira de Cercio” á defensa da cultura popular e en novembro do 2021 o segundo premio á iniciativa empresarial da Deputación de Pontevedra con A
COVA DAS LETRAS.
O teatro é a miña paixón, o meu traballo e a miña vida.
No 2013 formei A Cova das Letras, compañía teatral que ten por obxecto fomentar o teatro no medio rural. Nace así, Medias Verdes Teatro, un grupo amateur de A Bandeira, que coordino, xunto cos grupos infantís de teatro espallados pola comarca do Deza. Son mestra de Música e Movemento na Escola Municipal de Música de A Bandeira. Coordino tamén outros proxectos de índole social coma “Sair por un intre”, no Centro Penitenciario de Monterroso e “Teatro en feminino”.
A Cova das Letras foi medrando e leva a escena ás súas montaxes, sempre baixo unha perspectiva de defensa da muller traballadora rural e dando prioridade a cultura e lingua galega. Entre as nosas montaxes destacan: O circo dos contos, xunto con Beatriz Pena, A Fotógrafa, ó carón de Pilar Abades, Mariñeiras da man de Sonia García ou o contacontos A Corva, Procúrase Pepa a Loba ou María Pita, conversas cunha heroína ou recentemente estreada, A Alquimista. A compañía somérxese en proxectos musicais coma A Gata con Zocos, Animalia (con Josito Porto) ou A familia Brañas, comedia musical onde os títeres se
fusionan coas bandas de música, pezas coas que xiramos polas diversas bandas galegas e estranxeiras, da man de Anxo García, Martiño Mato e Manuel Paino. Teatro á feira,
teatro de rúa e Son no berce, un concerto sensorial para bebés son outros proxectos da compañía. Actualmente, somérxese no proxecto de danza FRIDA coa coreógrafa Olga
Cameselle baixo a dirección de Rocío González. Moitas das montaxes reciben a axuda e patrocinio da AGADIC.
